مشهد من مسرحيتي الشعرية..«أنتيكات»./ للكاتب جبار القريشي / العراق.................

 مشهد من مسرحيتي الشعرية..«أنتيكات».

جبار القريشي

لوحة رقم (١٢)

(يعود الظلام فيخيم على المكان، بقعة ضوء تظهر گاصد يجلس على ذات الرصيف محبطا، والى جواره صينية داطلي. متحسرا يحدث نفسه.)

گاصد: ما تگلي.. شوكت ترتاح گاصد؟.

عمر جبته.. لا إنت زارع.. ولا إنت حاصد

ولو گايليهه..

الماله أول.. ماله تالي. .

طول عمره جيبة خالي..

أمي الله يرحمهه.. چانت دايما تگول..

الكتب لمي كتبلي..

لا ساويت الوراي.. ولا ساويت الگبلي..

ماتت والدمعة بعيونهه..

( يبكي..).

خطية.. مرات الذاكرة تخونهه..

بحيث تنسة حتى إسمهه..

تگلي يمه.. آني شسمي؟..

أگللهه أم گاصد غير..

تگلي ياگاصد؟.

(ينفجر بالبكاء)

أگوم أبچي..مدري أبچي عليهه..

مدري أبچي على روحي..

ساعتهه تتفتك كل جروحي..

(گاصد.. يبكي بمرارة والم.).

دنية.. عداوتهه ويه الفقير.

تعوف النايم على ريش النعام.. وتحط گورهه ويه العايش عالحصير.

(گاصد.. يتأمل ملابسه الممزقة، ينظر الى يديه وقدميه وقد علق بهما ما علق، متحسرا..)

على مساحة الكون..

وين أكو رصيف، تلگه گاصد.. بس بغير صورة..

تمر السنين والاعوام..

تتغير الوجوه والحكام..

وگاصد هوه هوه..

بكل زمان، وكل مكان، ما يتغير.

(گاصد يرفع صينيته.. وقبل أن يخرج يتأمل الجمهور ويقول متحسراً.).

الله كريم...

منه الرزق.. وعليه العوض.

...........

٤